નર્મદા બાલઘર સ્પર્ધા ૨૦૨૫ માં
આપનું હાર્દિક સ્વાગત છે

નર્મદા બાલઘર સ્પર્ધા 2025

પ્રિય શિક્ષકો અને સ્વપ્નદ્રષ્ટા વિધાર્થીઓ,

અમને આશા છે કે આ સંદેશ આપના જ્ઞાનને વધુ સમૃદ્ધ અને દૃષ્ટિસંપન્ન બનાવવામાં સહાયક સાબિત થશે. આજે જ્યારે સમગ્ર વિશ્વ અવિશ્વસનીય ગતિએ આગળ વધી રહ્યું છે, ત્યારે જિજ્ઞાસા, સર્જનાત્મકતા અને ટેક્નોલોજીનો યોગ્ય ઉપયોગ કરીને બાળકો પોતાનું ભવિષ્ય ઘડી શકે, તે દિશામાં નર્મદા બાલઘર સતત માર્ગદર્શન પૂરું પાડી રહ્યું છે.

નર્મદા બાલઘર હંમેશાં માનતું રહ્યું છે કે શિક્ષણનો હેતુ માત્ર નોકરી મેળવવો નથી, પરંતુ પ્રયોગો દ્વારા કંઇક નવું શીખવું, નવું સર્જન કરવું અને સમાજમાં સકારાત્મક પરિવર્તન લાવવું જોઈએ.

ચાલો આપણે, સૌ સાથે મળીને ‘મેક ઈન્ડિયા ગ્રેટ’ ના ભગીરથ યજ્ઞમાં જોડાઈએ અને ભાવિ પેઢીને ઘડીએ, જ્યાંથી તેઓ માત્ર સપના નહીં જુએ, પણ તેમને સાકાર પણ કરી શકે.
અનુભવી અને ઇમર્સિવ લર્નિંગને પ્રોત્સાહન આપવાની અમારી યાત્રા વર્ષો પહેલા શરૂ થઈ હતી. અમારી દૃષ્ટિએ દરેક વિદ્યાર્થીમાં પોતાનું ભવિષ્ય નવી દિશામાં દોરવાની અનન્ય ક્ષમતા હોય છે. કોરોના મહામારી દરમિયાન, જ્યારે આખું વિશ્વ થંભી ગયું હતું, એ સમય પહેલાં વિદ્યાર્થીઓએ વિવિધ સ્પર્ધાઓમાં ભાગ લઇ પોતાની તેજસ્વીતા, પ્રતિભા અને આત્મવિશ્વાસના અનોખા ઉદાહરણો રજૂ કર્યા હતા. આ અનુભવો આજે પણ અમને પ્રેરણા આપે છે કે દરેક બાળકમાં અમર્યાદિત શક્તિઓ છુપાયેલી છે. કેવળ જરૂર છે યોગ્ય માર્ગદર્શન અને પ્લેટફોર્મની.

2016-17 સ્પર્ધા: જેમાં ૫૦ ટીમો (૨૦૦+ વિદ્યાર્થીઓ) એ સ્પર્ધામાં ભાગ લીધો હતો અને ₹૫૦,૦૦૦ ના ઇનામો જીત્યા.
2017-18 સ્પર્ધા: જેમાં ૧૨૮ ટીમો (૪૦૦+ વિદ્યાર્થીઓ) એ સ્પર્ધામાં ભાગ લીધો હતો અને ₹૭૫,૦૦૦ ના ઇનામો જીત્યા.
આ જીત તેમના સ્પર્ધાત્મક જુસ્સાનો પુરાવો આપે છે.
આ કાર્યક્રમો માત્ર સ્પર્ધાઓ નહોતી, પરંતુ નર્મદા બાલઘર દ્વારા વિદ્યાર્થીઓને વિકાસના માર્ગે દોરી જતી એક મજબૂત પાયાની શરૂઆત હતી. આ પ્લેટફોર્મે વિદ્યાર્થીઓને જીવનમાં આવતી પડકારભરી પરિસ્થિતિઓના ઉકેલ માટે વિચાર કરવાની, સર્જનાત્મક દૃષ્ટિ અપનાવવાની અને નવી પહેલ કરવાની તક આપી. આજે જ્યારે, આપણે નવી ટેક્નોલોજી સાથે શાળાઓમાં ફરીથી સક્રિય બની રહ્યા છીએ, ત્યારે આવો આપણે સૌ મળીને વધુ તેજસ્વી જ્યોત પ્રગટાવીએ.

રિફ્રેશર તાલીમ & દિશાસૂચક સેમિનાર

બધા પ્રતિસ્પર્ધીઓ સ્પર્ધા માટે સારી રીતે તૈયારી કરી શકે તેના માટે રિફ્રેશર તાલીમ અને જીવનજરૂરી ઉપયોગોને લગતાં સેમિનારનું 2^nd મે થી 31^st જૂન 2025 સુધીનું આયોજન કરેલ છે. તમારી અનુકૂળતા માટે ઉપલબ્ધ ક્લાસીસનું સમયપત્રક સાથે જોડેલ છે. 30 એપ્રિલ પહેલાં, તમે જે પણ કોર્સના ક્લાસીસમાં ભાગ લેવા માંગો છો તેની અમને જાણ કરવી. આ સ્પર્ધા જૂનના ત્રીજા સપ્તાહથી લઈને જુલાઈ દરમિયાન યોજાશે.

સેમિનાર: મે-જૂન મહિના દરમિયાન, ઉદ્યોગજગતના તજજ્ઞો દ્વારા તેમના અનુભવો રજૂ કરતાં ચાર સેમિનારો યોજાશે. દરેક સેમિનારનું 3 અઠવાડિયા પહેલા શેડ્યુલ જાહેર કરવામાં આવશે. અમે દરેક શિક્ષક અને વિદ્યાર્થીને તેમની ક્ષમતાઓને પ્રદર્શિત કરવા તેમજ ટેકનોલોજી અને ભવિષ્યમાં સંશોધનક્ષેત્રે યોગદાન આપવા માટે પ્રોત્સાહિત કરીએ છીએ. અમે 2025 ની સ્પર્ધામાં તમારી ભાગીદારીની આતુરતાથી રાહ જોઈ રહ્યા છીએ.


શુભેછાઓ સાથે ,
નર્મદા બાલઘર ટીમ.